Ilocano language, culture, literature

Thursday, February 22, 2007

Bannawag Website--An Open Letter

Patgec a Djuna,

Iti pammatic, dackel a tulong ti maipaay ti pannacaipablaac--cas iti LABAW anthology--dagiti putar dagiti amin a mannurat tayo iti Ilocano, saan laeng a manipud cadagiti taga-La Union no di ket manipud iti sapasap tapno iti casta mabalin ti siasino man nga agduyos nga agbasa iti Literatura Ilocana ti gumatang cadagitoy a published collections wenno mapan iti caasitgan a library a pacasaracan cadagitoy. Ngamin ta uray no casano ti panangipamuspusan tayo a mangpatanor iti Ilocano--nangnangruna cadagiti ubbing iti elementaria ken high school--no awan met ti naan-annay a libro iti Ilocano a basaen da. Narigat met a namnamaen nga agregget dagitoy a macasursuro ken di macalipat iti nacayanacan a pagsasao.

Mabalin, ti caawan wenno kinatiggit ti demand cadagiti mapili a putar dagiti mannurat tayo iti Ilocano iti forma a cas iti LABAW ti cangrunaan a paricut ti panangipablaac iti anthologies. Ngem itan adda pamupusan tapno mataginayon ken madadaan nga ucagen dagiti pinanid ti Literatura Ilocana 24/7: isu dayta ti panangipablaac cadagitoy iti las-ud ti Internet. Mabalin nga ipablaac ti amin a sinurat, saan laeng a dagiti mapili wenno capintasan, tapno iti casta mausisa dagiti aggagar nga agusisa no casano ti panagrang-ay ti literatura tayo.

Tangay maysa cayo cadagiti oficiales ti GUMIL Filipinas, mabalin maal-lucoy yo ti liderato ti GUMIL a mangisingasing iti Bannawag a mangipasdec iti website tapno maipablaac ditoy ti amin a sarita, novela, daniw, salaysay, ken dadduma pay, manipud idi nangrugi a naipablaac daytoy a periodico (current issue plus archives). Nalabit no maicanada la ket di ti subscription rates (monthly, quarterly, semi-annually, or annually), adu met ti mayat nga ag-subscribe. Lalo pay nga adu no libre! Wenno adda FREE TRIAL.

Toy siraraem,


Joe Padre

6 Comments:

  • At Thursday, February 22, 2007 6:29:00 PM, Anonymous Djuna Alcantara said…

    Joe,

    Agyamankami unay iti naisangayan a kapanunotanyo. Ala, bay-am ta yumanminto daytoy a singasingmo inton Marso 4, 2007 iti maudi a Board Meeting ti GF iti agdama a liderato.

    Addanto dagiti mangibagi iti Bannawag a pangiyumanan itoy a singasingyo.

     
  • At Thursday, February 22, 2007 6:47:00 PM, Blogger Joe Padre said…

    Dear Djuna,

    Adda madama a sangsangalec a salaysay a casla pammaliiw maipapan iti salaysay a napauluan iti "Panagbalbaliw ti pagsasao wenno kinasiasino nga Ilokano?" ni Apo Florencio R. Riguera a naipablaac iti Tawid News Magasin (Jan. 29, 2007). Nalabit addanto mainayon co ditoy no apay a masapul tay ti ad-adu a LABAW wenno ti Bannawag Website...

     
  • At Thursday, February 22, 2007 10:31:00 PM, Anonymous Djuna Alcantara said…

    Thanks for the info, Joe. Yes, I have already forwarded your suggestion to Editor Cles B Rambaud, for his information and perusal.

     
  • At Thursday, February 22, 2007 10:51:00 PM, Anonymous Cles B. Rambaud said…

    Dear Ading,

    Iti daydi pay laeng damo a miting ti editorial (ti magazine group: bannawag, liwayway, hiligaynon, bisaya) ken ti apoko ni mr. yap (emil yap iii) nga isu ti ibilbilangmi nga immediate bossmi, insingasingmin nga adda koma website ti bannawag ken dagiti sister magazinesna iti rason a saan amin nga ilokano, nangruna dagiti adda iti abroad, ket makaiggemda iti bannawag. Kuna ni Boss a napintas dayta a singasing ken innayonna nga adalenda dayta. Agdua a tawenton. Siguro, saan pay a panawen a maaddaan ti website ti bannawag ta iti nagkaadu a magasin nga ipabpablaak ti manila bulletin (mairaman ditoyen ti agriculture, cruising, animal scene)ti laeng manila bulletin newspaper ti addaan iti website. Daytoy ti gapuna nga uray kaskasano, madakdakamat ti bannawag iti dadapilan.com ni roy aragon. kas pangur-urayan, insingasingko ken ni roy a mantinerenna latta ti bannawag iti dadapilan.com-- uray table of contents laeng ti bannawag ti rumrummuar! nagadu a planomi nga iruar iti dadapilan.com a maipanggep iti bannawag (a pakairamanan ti excerpts dagiti rumrummuar a sarita ken salaysay) ngem agingga ita, dimi met la maitugawanen. nagsayaat koman no pumayso ti arapaap ni apo joe padre. ad-adu no kuan nga ilokano ti madanon ti magasintayo.

    malagipko la ket ngarud nga idi pay apagtapog ti 21st century, insingasingen ni roy aragon ti pannakapaadda koma ti website ti gumil filipinas-- ket isu pay ti
    mangmantiner iti daytoy a libre. ngem saan a nakapasa daytoy a singasing iti gumil filipinas gapu kadagiti nagkakadu a rason. ti inaramid met 'toy kabsatmo idi, nangiruar, babaen ti pammalubos ti gumil filipinas nga idauluan idi ti katuganganna a lalaki (ha-ha!)iti opisial a pagiwarnak ti gumil filipinas a managan iti BALIKAS a nagpaut iti dua a tawen (term of office ni apo joe.) babaen met laeng ti tulong ni roy, rimrimmuar
    pay ti BALIKAS iti Internet.

    best regards,

    cles

     
  • At Wednesday, March 21, 2007 5:48:00 PM, Anonymous Roy V. Aragon said…

    napintas unay manen daytoy singasingmo, manong joe. pagpaspasensiaannak latta koman ta no siak a maysa ket nagadu koma met ti singasing ken planok ngem gapu iti kinanumok laeng ken kaawan adu a kapet ken talek ti dadduma, awan ti maaramidak. isu a pagan-anusan laengen ti tuloy latta a panagsurat ken panagblog ken panang-maintainko iti nanumo a dadapilan.com.

    agyamanak met iti panangisapitmo iti emails da manang djuna ken manong cles. in a way, maragsakanak ta silalagip ni mang cles kadagiti singasingko idi. kasla mabannogak pay ketdin. adu met ti panggepko idi nga isaranay koma iti gumil mainaig iti presencena iti internet ken iti kasla maysa nga online database. ngem duma lang no datao a di matagtagari ken adda la no kua iti sulsuli a di unay makium-ummong ti agisingasing.

    nagmayat ket koman no palubosan ti manila bulletin publishing, inc. daytoy singasing a pannakaipempen iti web lalo dagiti daanen a linaon ti bannawag tapno laeng mapreserba dagitoy. nakitak ken naukagukagko met bassit idi ti archives wenno lilbrary ti bannawag ken liwayway idi kukua pay laeng ti liwayway publishing, inc. adda bassit a sipi a yan dagiti bounded a daan a kopia ti bannawag iti maikadua a kadsaaran ti lpi building iti pasong tamo st. nadamagko a nabati dagitoy nga archives idi immakaren ti bannawag iti manila bulletin bldg. iti intramuros.

    agdepende daytoy, manong, iti pagayatan ti manila bulletin, da dr. emilio yap. ngem iti panagkitak, adayo wenno awan iti planoda nga ikkan wenno yaramidan iti website dagiti adu a magazines ti bulletin a pakairamananen ti bannawag. ti concentrationda ket ti broadsheetda. ngem uray pay ti website ti manila bulletin ( www.mb.com.ph) ket dina mapataran ti ka-successful ken ka-effective ti website ti philippine daily inquirer (www.inquirer.net) wenno uray ti philippine star ( www.philstar.com). ken, nabayagen nga adda nailatang a website ti sunday magazine ti bulletin a panorama (www.panorama.com.ph) ngem agingga ita didan sa latta pay masango ta awan met nagunegna wenno nasayaat a mabasa online. no dida masango a mismo ti bukod a magazine ti daily broadsheetda, panagkunak nakarkaron a dida masango ti kas iti bannawag wenno hiligaynon wenno bisaya magasin.

    ti kas-angna tay ditay' met mabalin a kutien wenno usaren dagitoy a material no awan pammalubos ti manila bulletin.

    ngem padasem man ketdi nga emailan, manong joe, ni mang cles a mismo.

    toy adingmo,
    roy

     
  • At Wednesday, March 21, 2007 5:50:00 PM, Blogger Joe Padre said…

    Dear Roy,

    Agsipud ta cuna met ni Apo Cles Rambaud a "saan pay a panawen a maaddaan ti website ti bannawag", ti impasdec mo a dadapilan.com ti casayaatan a direccion ti intay pananggun-od iti tarigagay tay a maadaan iti Internet archive ti Ilocano literature. Nagsayaat coma no ited ti Bannawag ken dagiti dadduma a periodico iti Ilocano wenno dagiti naipablaaken nga antologia dagiti putar iti Ilocano ti pammalubosda iti panangilebben cadagiti Literatura Ilocana nga impablaacda uray nasursuroc a dua a tawen ti napalabas calpasan ti pannacaipablaacda (I know that the copyrights last more than 2 years, but if the copyright holders are willing to give their permission to have their more than 2-year-old-literary materials archived in dadapilan.com, that would be just nice and awesome). The web design of dadapilan.com is simply superior to handle the archiving job.

    I have a few suggestions on the organization of the content of the archive and what may be included in the archive and you are welcome to view them at Ilocano Online. Mind you, these are just suggestions and I plan to remove the website later on. The materials (some of which are yours!) that I've included in the website are just fillers to illustrate my suggestions. As far as the ilocano-online.com url is concerned, I had it registered, thinking it would be a more familiar name for the search engines. The same thinking went into the use of English in the subheadings. I know how diligently you've used the Ilocano equivalent of most items in dadapilan.com. That's excellent. However, in the beginning, it might help to still add the English equivalents of those navigation buttons/icons or subheadings. You know I have different leanings at the moment on the orthography; however, I defer to the orthography you're using right now. (I plan to write something to justify my belief in the alternative orthography [that includes the 28-letter alphabet last prescribed for Filipino] which covers the whole spectrum of written Ilocano.) Sinurot ti Bannawag ti 20-letter ABAKADA ti Wikang Pilipino idi mid-1900s; diac maawatan no apay a saan a simmurot ti Bannawag iti 28-letter alphabet nga inkeddeng nga alphabet ti Filipino idi 1987.

    Let me know what you think about the suggested contents of the archive and how they are organized. If you want to use ilocano-online.com, you have my permission; in addition I'd be willing to pay for the initial two-year hosting fees of the 100-gigabyte/1000-gigabyte monthly transfer Deluxe hosting package at godaddy.com (approx. $5.59/month). After that, I suppose the income from ads probably could cover the hosting fees.

    The point is we need to unlock those Ilocano literary works long hidden from the public view because the publishers or copyright holders have not made them available and accessible at the Internet or in published form readily available at public libraries and/or bookstores and build on them. This is the best insurance for the perpetuation of the Ilocano, his literature, language and culture, regardless of where in the world he lives.

    Regards,


    Joe Padre

     

Post a Comment

Links to this post:

Create a Link

<< Home