Saludo ken ni Andy Barroga ken ti Iluko.com

Idi punganay ti Dios pinarsuana dagiti tangatang ken ti daga.

Ket idi Marso 2002 pinutar ni Andy ti Iluko.com ket iti uneg ti umuna a tallo a bulan dimmayo ti agarup sangapulo ribu nga Ilocano manipud iti amin a suli ti lubong, ket nakita ni Andy a nasayaatda.

Ket linucatan ni Andy dagiti benneg Dap-ayan, Pinacbet, Makipagayam. Literatura, ken dadduma pay ket casla batombalani dagitoy cadagiti nangisit ti sikona nga Ilocano (ken uray no saan) manipud iti amin a desdes ti biag iti dagup sangalubongan, ket macaguyugoy ti awis nga umay agpal-lailang iti Iluko.com. Inaldaw a rinibu dagiti Ilocano a dumaw-as iti Iluko.com ket nakita ni Andy a nasayaat dayta…

Genesis dagiti Ilocano netizens? Nalabit.

No agpasiarca iti Dap-ayan ti Iluko.com ket mabasam dagiti panagpipinnatang a nalimugan iti panagkikinnarit, lunod ken nacas-ang a panaggi-innala, cayatmo nga iyarig ni Andy Barroga iti Pied Piper of Hamelin. Pagsayaatanna, iti sabali a bangir, adda met dagiti agpipinnatang a nadalus ti dila da, manakem, macaandingay ken paglaingan dagiti pagsasaritanda. No mailaw-anca iti benneg Literatura ket mabasam dagiti sarita, daniw, novela, drama, Bucanegan ken dadduma pay, mapanecnecam a dagiti akinputar cadagitoy isuda dagiti cangrunaan a mannurat iti Iloco, ken dagiti dadduma a naipablaac ditoy ket immuna a nagparangen iti Bannawag. Di cad apirasem ta timidmo saca mapaisem iti bangbangir ket agbalawca no amangan adda ketdi anting-anting wenno naisangsangayan a pannacabalin ni Andy iti panangurnosna iti Iluko.com.

Kinapudnona, no adda maysa a parsua a nacapanunot no casano nga ummungen dagiti Ilocano iti lubong iti maysa a suli ti World Wide Web—ti Iluko.com—tapno aguperda iti bucodda a pagsasao, makidigo, makipinnatang wenno makidamag cadagiti padpadas, pammati, pamanunotan, pacasecnan, caugalian (cultura), ken paandingay cadagiti sarita, daniw, novela, burburtia ken dadduma pay a forma ti Literatura Ilocana, isu daytoy ket awan sabali no di ni Andel Barroga.

Tubo ti Luna, Apayao, inrugi ni Andy ti nagadal iti electrical engineering iti St. Louis University ti Baguio City . Ngem gapu iti awis ti panagbaniaga, dina naturpos daytoy nga inrugina.

Nacadanon iti Hawaii idi 1988 ket landscaping (panagdalus iti solar dagiti babacnang) ti immuna a trabajona. Nadlaw ni Andy nga adda dagiti padana a Filipino a naestilo ti cawesda ken agub-obra cadagiti high-rise air-conditioned offices iti puseg ti ciudad Honolulu ket immapay ti ilemna. Isu a bayat ti panagtrabajona, incagumaanan ni Andy ti nagadal iti computer programming. Babaen ti tulong ni Tatangna, nagsubli iti escuela.

Nangrugi a data entry clerk iti maysa a banco, immasenso a system administrator ti maysa a mortgage company. Calpasan ti maysa a tawen, immalis iti Bank of Hawaii, cadackelan a banco iti Hawaii . Intultuloy na ti nagadal cadagiti software ti Microsoft, cas iti SQL Server, maysa a programa a pangimaton cadagiti dadackel a databases. Ket immapay ti panagtarigagayna a macadanon iti nangatngato pay a pagrebbengan.

Iti umuna a gundaway a nacabisita iti cabsatna a nurse nga agtaeng iti Seattle, Washington, incagumaanan ni Andy ti napan nag-apply iti Microsoft Corporation (Redmond) cas insingasing ti cabsatna. Nupay napaay iti umuna nga interview, saan a naupay daytoy ket napagasatan iti maicadua nga interview. Inawatna ti naidiaya a gundaway nga agtrabajo iti Microsoft Corporation ket ditoy ti agdama a pagtrabajuan ni Andy cas database engineer. Agarup lima a tawennan iti compania. Inkeddeng ni Andy a sadiay ti pagramutan ti familiana—ti caingungotna a ni Jossie ken dagiti dua nga annacda.

Ania a talocatic ti nacatucay iti panangirusat ni Andy iti bucodna a website? Cunana a ti nagcauna a "Burnay" ni Roy V. Aragon, maysa a nalatac a mannurat iti Iloco, ti nangriing kencuana. Ngem nupay no casta, adda iti sirmata ni Andy ti pannacasangal ti Iluko.com tapno maguyugoy nga agpal-lailang ditoy dagiti Ilocano ti lubong.

Iti pammaliiwco, awan ngata ti sabali a macapatas iti daytoy panangummong cadagiti sangalubongan nga Ilocano netizens iti maysa a website babaen ti awis ti maysa a pagsasao, cultura ken literatura. Ni Andel Barroga laeng ti cacaisuna a mabalin a mangaclon iti dayta a pammigbig ken pammadayaw.