Ilocano language, culture, literature

Thursday, February 19, 2009

ILOCANO ONLINE--Our New Blog

Since you've reached this far, we would like to invite you and redirect you to our other blog,

ILOCANO ONLINE (ilocanoonline.wordpress.com),

where we'll continue blogging on essentially the same themes AND THEN SOME.

THANKS.

Tuesday, February 17, 2009

BANNAWAG INTERNET EDITION: Ur-urayenmi


Manipud idi nangrugiac nga agbasbasa iti Bannawag idi 1950s agingga ita, dackel ti nagbaliwan ti lubong, nangruna iti panangimaldit iti sinurat. Ayanna a pagdacsan no naimaldit laeng iti papel, cas iti agdama a Bannawag, dagitoy ti mabalin a mapasamac: (a) maibelleng wenno usaren a pagbungon ti ania man (agraman daing a monamon) dagiti daan a Bannawag, (b) idulin ti daan a Bannawag ngem gapu ta caadduanna ti awan temperature-controlled a pagidulinan, ag-deteriorate ti calidad ti newsprint a nacaimalditan ti Bannawag agingga iti tumayengteng ti maris dagiti pinanid a dimon mabalin a basaen ti naimaldit, wenno (c) ibelleng wenno usaren a pagbungon dagiti immuna nga indulin tapno adda pangidulinan cadagiti barbaro nga issues.

Uray no cayat ti agbasa cadagiti nacadulin a daan nga issues ti Bannawag, no dadduma umapay ni kinasadut a mapan agucag, nangruna no awan pamalpalatpatan no ania nga issue ti nacaipablaacan ti cayat a basaen.

Cadagiti agduyos nga agadal nga agsurat iti Ilocano wenno siasino man nga agtarigagay nga agusisa iti sasaaden ti Literatura Ilocana, bigbigec a dackel a problema ti kinakisang wenno kinaawan dagiti public/private libraries a sidadaan a mangidiaya iti Bannawag, nangruna dagiti daan nga issues na. Gapu iti caawan ti gundaway a mangidilig iti calidad dagiti nagcacauna wenno nabiit laeng a napalabas a sinurat ken ti calidad dagiti agdama a sinurat, casano a maicalicagum ti panagdur-as ti literatura tayo? Ania a panacderan ti mangisingasing a napimpintas dagiti putar dagiti agdama a mannurat tayo mayarig cadagiti putar iti naglabas?

Maliclican dagitoy paricut a nadacamat iti ngato no maipablaac ti Bannawag iti Internet. Mabalin nga adda kinamuyot ti maysa a mannurat a mangipagarup a ti putarna ti capintasan no awan met pangidasiganna iti daytoy. Ket no maysacan a cuto-cuto iti Internet, ammomon no apay. Agsipud ta adu ti masaracan iti Internet a pangyarigan, saan laeng nga iti bucod a pagsasao. Ken adu ti masursuro iti Internet a macatulong iti panagputar ken mangitudo cadagiti saluadan nga estilo ti panagputar.

No yasping ti Literatura Ilocana cadagiti nadumaduma a literatura ti lubong, cas iti Japon, Ingles wenno Castila, adda cadi maipadis a nagrang-ayan ti bucod tay a literatura? Adda ngatan mannurat iti Ilocano nga addaan iti naurnong a sinurat a napintas ti calidad na a mabalin nga ibilang iti sangalubongan a salisal para iti Nobel Prize for Literature? Awaten ngata dagiti mannurat ken agcalicagum nga agbalin a mannurat iti Ilocano daytoy a carit tapno ipennecda ti panangadal cadagiti nadumaduma a ramit ken estilo ti panagsurat tapno umasenso ti calidad ti isuratda?

Wednesday, February 04, 2009

Bannawag: Internet Edition


Segun ti naawatmi nga email a naggapu ken ni Cles B. Rambaud, Associate Editor ti Bannawag, idi Enero 30, 2009, dandanin mairugi a maipablaac ti Internet Edition ti Bannawag.

"Dandanin agmata daydi arapaapmo nga adda koma met website ti Bannawag," insurat ni Editor Rambaud. "Uray dagiti kakabsat a magasin ti Bannawag, addanto metten websiteda. Inaprobaranen ti MB Management daytoy a kiddaw."

Nadacamat mi dayta nga "arapaap" iti blog entry ditoy a napauluan iti "Bannawag Website--An Open Letter" a naipaskin idi Feb. 22, 2007 nga isu ti nangisingasingan mi a mangipasdec ti Bannawag iti bucodna a website (Internet Edition).

Iti panangipagarupmi, dackel nga addang daytoy a decision ti Manila Bulletin management, akincucua iti Bannawag, a mangpapigsa iti tignay a panangparang-ay ken ti panangtaginayon iti pagsasao nga Ilocano, agraman ti cannawidan ken Literatura Ilocana.

Padaanantay ngarud ti Internet Edition ti Bannawag!